จำนวนการดูหน้าเว็บรวม

วันเสาร์ที่ 28 กันยายน พ.ศ. 2556

                                         ..รวมบทผญา..ตามอารมณ์นำพา..
                                         อีเกียแดง แห่งรัตติกาล




พี่น้องเอ๋ย..

เถิงแหม่นสายทางขั่น สายสัมพันธ์หั่นคงอยู่
เปรียบประตูยู้กายต้อน ซอนใจเข้าได้เลาฟัง
ดุจคือดั่งอ้ายน้อง เกลียวสีทองฮักหมั่นแก่น
เป็นสายแนนแขวนเกี่ยวไว้ บ่ไลร้างดอกห่างกัน..

ขอให้ฮักเสมอหมั่น อย่าป๋ากันน้อถิ่มปล่อย
ให้ซ่อยซูซ่อยซ้อน คองเค้าแต่เก่าเดิม
เชิญมาเสริมเติมร่วม กระบวนความให้คงอยู่
ไขประตูสู่ป่องเอี้ยม เคียมเค้า..แต่เก่าหลัง..นำกันครับ

อีเกียแดง แห่งรัตติกาล

ขอบคุณรูปภาพจาก
Surin Sky View (เจ้าของภาพ)
Buriram City เขากระโดง - เมืองบุรีรัมย์
..ภาพมุมสูง พระสุภัทรบพิตร บนยอดเขากระโดง บุรีรัมย์..(ปากปล่องภูเขาไฟ)ครับ




































ดอกแคบานกลางท่งกว้าง.หัวใจป่วงคนิงเถิง
อ้ายนั่งเทิงเถียงนา.สายตามองตรองเห็นกลุ้ม
ปานไฟสุมมันรุมเข้า ใจบ่เซาคิดฮ้อนฮ่ำ
ย้อนคึดนำนารทน้อง ผู้เคยอ้อน.นั่งเคียง..เด้น้อ

หล่านางเอ๊ย..

เหลือแค่เพียงฮอยเจ้า ที่เคยเหล่าเฮาเคยหา
เจ้าบ่กลับคืนนา ป๋าหัวใจไว้แคต้น
หัวใจชายมันดำหม่น ย้อนหน้ามนบ่ท่องเทียว
ไปบ่เหลียวหลังจ้อย ปล่อยอ้าย..ป่ายน้ำตา..เเท้น้อ


อีเกียแดง แห่งรัตติกาล/

             ภาพจากญาอ้ายภูเพียงครับ










 หล่านางเอ๊ย..

ปลายฤดูฝนคล้อย ลมวอยวอยลอยมาเปลี่ยน
ภาพหลอยเวียนเจียนใจอ้าย คือหมายย้ำให้ฮ่ำฮอน.
วาทะกลอนเคยวอนเว้า โฉมเฉลาเจ้าบอกหน่าย
ปล่อยจุดหมายหาซายซ้อน เหลือคอนไว้ให้ไก่แยง..บ่ฮึ๊..

ย่างตะแคงจั่งลืมส่น โอ๊ย.หน้ามลคนบ้านป่า
ปานว่าหงห์ได้เหิรฟ้า ถลาขึ้นบ่หมื่นลง..แท้น้อ..

อีเกียแดง แห่งรัตติกาล


ขอบคุณภาพจาก PV rainbow.ครับ

































หล่านางเอ๊ย..

ย้านหัวใจสิเพม้าง ย้อนหนทางเป็นโตเปลี่ยน
ย้านควมเพียรของฮักเจ้า สิไลร้างดอกห่างหนี
ย้านคนดีหนีไปหน้า ถิ่มหนุ่มนาให่นอนป่วง..เด้น้อ
ย้านฮักลวงหลอกต้ม ขมแล้วกะแส่วกลาย

ย้านควมหมายของฮักแท้ เหมิดทางแหว่แป๋ทางเดิน..
ย้านว่ากายที่เคยเพลิน ถืกเจ้าเมินน้อป๋าไว้
ย้านเจ็บในจนเป็นไข้ เหมิดทางไขใล่ตกป่อง
ย้านว่าเคียดึงจ้องไว้ ทางใจเจ้ากะเหล่าลืม..สั่นแหล๊ว..

อีเกียแดง แห่งรัตติกาล//


{ภาพ..พระเจดีย์ใหญ่ชัยมงคล จังหวัดร้อยเอ็ดครับ..} 
   









 


 หล่านางเอ๊ย..

คำเฮาสัญญาไว้ บ่ลืมไลน้อป๋าปล่อย
ยังคงลอยมาออยเว้า เหลาใจให้ได้คึดนำ
แหม่นถลำห่างไปหน้า ห่างกายาวาจาอยู่..อยู่เด้อ
ป่องประตูบ่ฮู้แย้ม เก็บแซมซู้เข้าอู่ใจ

อันว่าในโลกานี้ มีสาวอื่นอยู่หมื่นแสน..นางเอ๊ย
ใจบ่คลอนแคลนฮัก สลักลงยังคงไว้
อยู่ในใจเสมอหมั่น บ่เคยผันดอกเป็นอื่น
เก็บวันซืนยืนหวนพ้อ รอมื้อให้ได้ไต่คืน..สั่นแหล๊ว..

อีเกียแดง แห่งรัตติกาล


เก็บภาพท่งนาเกาหลีมาฝากครับ









 
หล่านางเอ๊ย..

อันว่าฝนมันหลงฟ้า ชลธามันหลงฝั่ง
ปลาหลงวังอั่งน้ำ บ่หวนหย่อต่อคืน
กระต่ายยืนตื่นจันทร์เจ้า หลงแยงเอาจนว่าป่วง
อ้ายหลงครวญฮ่วนหาเจ้า เทิงยืนเศร้า.เล่าคึดนำ..สั่นแหล๊ว..

อีเกียแดง แห่งรัตติกาล/


เก็บรูปพระจันทร์เต็มดวงจากทางประเทศเกาหลีมาฝากครับ..